我們的超低能日誌: 第一次出賣桐桐

貫徹番自己既宗旨，點都要搵D日本野黎講下。

日文入面有一個詞語叫做「親バカ」。點解？親（OYA），即係阿爸阿媽；バカ，寫做漢字既話，大多數人應該一睇就知道：「馬鹿」（BAKA），直接解就係蠢材。親バカ，就係講個D錫到自己屋企細路燶晒，自己屋企細路乜都岩、乜都最好個D阿爸阿媽囉。

話說我做左桐桐阿姨都三年有多，雖然成日笑佢嗌住要「玩屎屎」、成日笑佢個鼻哥窿好大、成日鎖佢響黑房入面……但其實我真係好鍾意桐桐架！桐桐連個大鼻窿都可愛D！其他細路彈開一二邊啦。

有單野，我已經同N個人講過，但係俾我講埋今次啦。最後今次。應該。

話說個次買左盒明治杏仁朱古力食。好耐之前碧咸做代言人個隻，打開個盒，要揭開張紙先見到D朱古力。我食完之後，擺左個吉盒響書檯上面。桐桐入黎我房，見到好野，即刻扮無知：「依個咩黎架？」

我拎起個吉盒遞俾佢：「請你食啦！」

佢即刻對眼發晒光咁，得得戚戚咁捧住走去同老豆講「阿姨送架！」，仲收埋入佢個老鼠樂園公主背囊入面。

後尾我聽番佢阿媽我家姐講，隔一日打開屋企個雪櫃，無啦啦見到入面擺左盒明治朱古力，但係入面一粒朱古力都冇，反而張紙就俾人咬左一忽……於是佢就走去問桐桐：「你食左張紙呀？」桐桐否認之，佢阿媽我家姐追問：「咁依一忽去左邊？」桐桐：「垃圾桶！」

桐桐真係好可愛。

後尾有一次，我又拎左個吉既明治朱古力盒俾桐桐個，佢即刻話：「又係依個？！」

桐桐真係好可愛。唔明有咩咁可愛？依D咪叫「親バカ」囉！